باي باي ”محمد سامي”.. وأهلا بـــ ”الدراما الهادفة”!!

تابعت على مدار الأيام اللي فاتت، ردود الأفعال الجماهيرية على نبأ اعتزال "محمد سامي" مخرج دراما البطل الشعبي، والحارة الشعبية، والبانوراما الشعبية لدولة الهند الشقيقة..

وقريت منشوره اللي أكد فيه أنه نظرا للظروف العصيبة التي تمر بها البلاد، فقد قرر أن يتنحى تماما، عن أي مسلسل رسمي، أو عمل درامي، وأنه سوف يعود إلى صفوف جمهور المشاهدين، يؤدي واجبه كأي مواطن في الفرجة على أعمال أي حد تاني، ممن سيقع عليهم الاختيار لقيادة دفة الدراما كما يجب أن تكون، تحت رعاية السيد رئيس الوزراء شخصيا، الذي زف بنفسه الخبر السعيد الذي طال انتظاره، وهو تشكيل لجنة للإشراف على محتوى الدراما اللي يجب ان الناس تتفرج عليها ..

وبعيدا عن تزامن قرار الاعتزال ده مع تصريحات السيد رئيس الوزراء

وبصرف النظر عن الخطيئة الكبرى ...والكوميدية اللي ارتكبها العبد لله، حين توقع انتفاضة ناس بعينها من قادة الفكر والثقافة والوعي، ورؤوس حربة الدفاع عن حرية الرأي والتعبير والإبداع.. علماني مصر الحبيبة.. السادة التنويريون على ما تفرج..

وأشوف واحد يوحد الله منهم يبدي مجرد اعتراض.. لأ اعتراض ايه أستغفر الله العظيم .. آسف ..أقصد مجرد رأي.. إستفسار اوزي كده على خفيف .. ويسأل يعني ايه "فن" يبقى تحت إشراف "لجنة" .. بقرار "وزاري" !!

طبعا تراجعت عن الأفكار "السو" دي، خصوصا إن لا صوت يعلو فوق صوت قيم الأسرة المصرية.. والمحافظة على الآداب العامة والأخلاق الحميدة اللي هذا المحمد سامي عمال يلعب فيها دون رادع أو رقيب..

بالعكس.. وبعد تفكير عميق، لقيت إن القرار كان لازم ييجي من فوق بقى .. معروف طبعا إن كل المجتمعات على ظهر الكوكب.. مفيش جهة غير الدراما وفن التمثيل عموما، هي اللي مسئولة عن تهذيبه وإصلاحه، وتعليمه الصح من الغلط، الحلال من الحرام، الوطنية من الخيانة..

مفيش غير الريموت والقعدة قدام فيلم ولا مسلسل، هي وسيلته اللي تربيه وتفهمه أنه ميسرقش، مينافقش، ميبيعش ضميره أو علمه أو قلمه للي يدفع اكتر ..

مفيش بيوت وآباء وأمهات هما اللي مفترض دورهم يربوا ويطلعوا إنسان سوي .. "حر" .. قادر يخرج للمجتمع يأثر ويتأثر بيه .. قادر يفرز ويختار بحرية يتفرج على اللي هو عايزه، ومن غير وصاية وسكريبتات بالأوامر، تحوله من مشاهد قاعد بيتفرج أو بيتسلى بس حتى، لتلميذ قاعد ياخد جرعات وتعليمات وحصص أشبه بالحصص المدرسية، وتوجيهات على شاكلة أشرب اللبن لو لقيت تمنه في جيبك قبل ما تنام .. أغسل سنانك لكن بعد الأكل بس عشان المعجون زاد سعره الطاق عشرة ..

مفيش مؤسسات هو ده دورها القيمي والتربوي، زي المدارس والجامعات.. المساجد والكنائس مثلا !!

على أي حال.. ليس دفاعا عن محمد سامي.. انا مش من جمهوره ولا بحب أعماله، ومش عشان البلطجة أو الجعير أو أي قيمة من القيم اللي بيتشدق بيها ناس كتير، وما بيصدقوا يقفشوا في معركة آمنة وهاتك يا تلطيش..

محمد سامي بالنسبة لي مخرج مصري "هندي" بيقدم محتوى "هندي" بنكهة مصرية...أعماله مسلية هزلية لا تمت للواقع بصلة..

فانتازيا محببة لقطاع "كبير" من الجمهور وينتهي أثرها بمجرد انتهاء العمل..

يعتمد على تكنيك الإبهار والتشويق والإثارة وجودة الصورة على حساب الحبكة وجودة العمل اللي مش مهمة خالص ولا تعنيه ولا تعني جمهوره لأن زي ما قلنا إن العمل في حد ذاته خيالي "هندي" ..يعتمد على الأڤورة ولغة حوار وانفعالات لا يتحدث بها البني آدمين من الأساس..

أعماله وقت عرضها بتحقق أعلى نسب مشاهدة، سواء من جمهوره اللي بيحب اللون ده من الدراما، وسواء من منتقديه اللي برضه مبيفوتوش حلقة عشان يحصلوا على مادة للسف والهجوم والكوميكس..

قرار اعتزاله لو كان قراره بمحض إرادته يبقى هو حر وبركة يا جامع لو هتكون نتيجته إفساح المجال لمخرجين آخرين بيقدموا فن أرقى وأكثر واقعية واشتباك مع قضايا المجتمع الهامة....وربنا يسامحني على الكدب ده!!!!

أما لو كان تم إبعاده بقرار سيادي لمجرد إن رئيس دولة طلع قال كلمتين فاتحولوا كالعادة لأوامر واجبة التنفيذ سواء بتدخل مباشر منه أو بالتطوع جدعنة من المسئولين.. فده أولا يعتبر إجراء قمعي استبدادي بيجور على حق قطاع كبير من جمهور بيحب النوع ده من المسلسلات "الهندي"

وثانيا: الاحتفاء به كارثة وبيثبت إن بعض الناس معندهاش مشكلة مع الاستبداد في حد ذاته طالما طال واحد دمه تقيل على قلبهم