نسرين عيسي تكتب: الجميزة!
![](https://media.good-news.ca/img/0/5/5362.jpg)
بقلم: نسرين عيسي
دوشه ايوه هى دوشه جوه دماغى سببها السوشيال ميديا من آراء واتجاهات ووجهات نظر كلها غير متفقة تخدك بالظبط كأنك داخل لوحة غير واضحة المعالم عبارة عن خطوط لونها اسود قاتم متداخلة بشكل غير مدروس أو موهوب ، شئ أتعمل ليفرض نفسه عليك و ليخطف انتباهك ليزعجك هو ده الغرض وشعرت لفتره أن دماغى محتاجه هدنه من كل الشخبطة ، وفى وسط كل كركبة السوشيال ميديا قبلتنى “الجميزه” ايوه عزيزى القارئ “الجميزة" عارف قصص النداهه مين منا مسمعش عنها وهو ده بالظبط حالى مع " الجميزه " ندهتنى زيها بالظبط لكن ، لعالم او تقدر تقول حاله واقعيه حقيقيه طلعتنى من شخبطة اللوحه المزيفه ودخلتنى فى عالم تانى عالم انا بحبه وأحب أعيش فيه مع عقلى وقلمى فى ركنى المفضل
عارف لما تحس انك عايز تهرب من واقع فوضوي لواقع جميل بتحلم به او مفتقده من فتره هو ده احساسى مع فرقه "الجميزه" ووجدت نفسى بدور على الشاعر والملحن ناصر النوبي صاحب فكره فرقه "الجميزه " ليعرفنى اكتر عنها ووجد ت نفسى المره التانيه امام فيلسوف فى الفن الجميل صاحب ذوق مميز وإحساس راقى وفكر ممزوج بكل ماهو اصيل فنان بيبحث فى باطن الأمور بيخدك بفكره العميق ،و حتى اختياره لاسم الفرقه فيه فلسفه راقيه وندره ، وعرفت منه العلاقة بين شجرة الجميزة والاسم الفني للفرقه وهو ان الجميزة هي شجرة مصرية اصيلة تمثل للمصري القديم البعث والخلود حيث ، كان حلم المصريين حلما ابديا ، وهي ايزيس وهي حتحور ربتا الموسيقي والسحر والجمال ، وتعيش الشجرة اكثر من ٧٠٠ سنة .
ولأنه فنان حقيقى كانت تدور برأسه العديد من التساؤلات كيف يمكن ان نبعث الروح المصرية في الموسيقي والغناء واستعادة الروح المصريه الأصليه المسلوبه ووجد الاجابه فى أن الاغنية ربما تكون هي البداية، ف البدء كانت الكلمة فكيف يتسني له ذلك ؟! فقام بدراسة التراث المصري والعربي و دراسة للحن والموسيقي ، دراسّة لطبيعة وخصائص الاصوات الجميلة، فمن وجهة نظره و كما يقول المتصوفة ان الجمال لا يحتاج الي شاهد
ولكن ان تقبيح الحسن ،وتجميل القبيح هو ما اصاب الامة في كافة المجالات ،ومنها الاغنية موضوع الجميزة الان. و تجد عزيزى القارئ آلة الربابة ضمن الآلات الموسيقيه ، شويه وحتنطق الكلمه وكيفية التناغم والامتزاج مع الآلات الآخرى فى عمل جماعى كله تضامن وإحساس بيتخلله صوت نسائي واضح واصيل هو صوت الفنانه يم سويلم . قارئى العزيز لو عندك وقت ادخل على اليوتيوب واستمتع زاى ما أنا استمتعت بفرقه الجميزه .
والشئ الأصيل الجميل لا يقف عند نقطه واحده ليقينه بأهمية رسالته وهذا ما تفعله الجميزه
من مبادرة للحفاظ على البيوت القديمة بمصر من خلال مسابقة الجميزة ( البيوت العريقة والقديمة) أن مسابقة البيوت القديمة التى تقدمها الجميزة ببيت آدم جنوب غرب الاقصر
مسابقة التى يشارك فيها المتسابقون ، لأجمل صورة لبيت قديم ، الحقيقه انا اول ما شفت الصور المختلفه التى يشارك بها المتسابقين شعرت بقيمه الثروة العريقه لهذه البيوت القديمه وكأننا نصنع تاريخ لآثار جديده تكتشف فهى فكره فى منتهى الأبداع والذكاء من قبل الشاعر والملحن ناصر النوبى
وسوف يقام معرضا يضم جميع صور المتسابقين اول أكتوبر ويستمر المعرض حتى 7 اكتوبر ببيت آدم.
فرقه الجميزه اشتركت بالعديد من المهرجانات داخل مصر وخارجها و نالت استحسان وإقبال جماهيرى كبير .
انا شخصيا لما احب اختلى مع نفسى دايما بيكون بيصحابنى كتاب او قلم وورقه انقل فيها افكارى بمصاحبة مقطوعه كلاسيكيه من مزيكتى المفضله دلوقتى اصبح لى صديق جديد يرافقني فى ركنى الخاص وهو فرقه "الجميزه "!
![1](https://www.good-news.ca/wp-content/uploads/2019/10/1-300x300.jpg)
![2](https://www.good-news.ca/wp-content/uploads/2019/10/2-225x300.jpg)