هاني صبحي يكتب: قبل أن تموت ... تأكد أن ”وجدي العربي” غفر لك خطاياك!!

برغم إني باسعى جاهدا للبعد عن الكلام في السياسة، وبقالي كام يوم مش مركز مع السوشيال ميديا..لكن للأسف اتكعبلت في شوية بوستات بترد علي منشور منسوب لوجدي العربي، اللي والله ما أعرف هو فين ولا بيعمل ايه ومحسوب على نفسه ولا على الاخوان ولا أي تيار.. وأساساً اللي خلاني أهتميت اكتر.. إن منشوره تسبب في ظاهرة كونية نادرا ما تحدث.. وهي إني قريت وسمعت بوداني إعلاميين وسياسيين بيتكلموا على الأخلاق والدين في الرد عليه!! المهم قريت البوست اللي بدأ بالنظرية المصرية الخالصة على طريقة "مع احترامي لرأي حضرتك" .. اللي تلقائياً تأكد عزيزي القارئ ان اللي كتب كده هيشتمك ويلعن سلسفيل اللي جاب حضرتك لسابع جد . وده اللي عمله الحاج وجدي العربي بعد ما بدأ الكلام موجها حديثه لحسن يوسف وشمس البارودي بجملة انا مش شمتان ولا حاجة ((ولكن)) .. بس خلاص .. اللي قريته كان فوق طاقة استيعاب حد عنده مشاكل في القولون وعدى على باكبورت مفتوح حالا..شئ ملوش وصف ..كوكتيل من الحقارة والتدني وانعدام الاحساس..على الجهل حتى بأبسط حدود الإنسانية والدين نفسه اللي بقى ضحية لجهلنا كلنا كمجتمع قلوبه اتحجرت ووعيه صفري وتفكيره سطحي.. كل حاجة فيه قشرية بتسيب الأصل والواضح والمهم والمشروح، وحصرت الدين والكلام فيه والأسئلة عنه في سفاسف وتوافه الأمور وكل طرف بياخد منه نحتاية تحقق له مصلحته على منهجية "ولا تقربوا الصلاة" . وجدي العربي أعلن شماتة واضحة في غرق شاب، رغم أنه عارف إن ده اسمه ابتلاء ممكن يصيبك وانت فارس نبيل أو يصيبك وانت بلطجي وفاسد..شاب عنده ٣٥ سنة مات غريق ..لا له في السياسة ولا حتى الفن ولا حد سمع له حس اصلا ... الهراء ده  له أوصاف كتير مقدرش اقولها اخف وصف فيهم أنه غباء سياسي. وتصوير الموضوع على أنه انتقام إلهي يشفي صدور فئة ما من البشر هو افترا على الله ذاته من وجهة نظري.. اللي عمله وجدي العربي بيغذي اكتر فكرة الاستقطاب والتقسيم اللي اتزرع ما بين الناس . وبيصب اكتر في مصلحة أي طرف مستفيد من الفتنة. وهو بيتابع الناس مقطعة هدوم بعض في خناقات عبثية ولسان حال البسطاء..نار فلان ولا جنة علان.. وبيكرس اكتر فكرة استسلام ورضوخ أي شعب في أي مكان وظروف اجتماعية، لسلطة لا تصرح علنا باستبدادها، افضل من قبولهم لفئة، التجهم اهم صفاتها. والغلظة والكراهية أبرز سماتها.. بتشمت علنا بمصائبهم.. ياعم وجدي.. الشعب المصري كله رافض للديمقراطية وغير مؤهل للديمقراطية زي ما قال عمر سليمان ربنا يرحمه ويديله الصحة .. انت غير مؤهل للديمقراطية وانا غير مؤهل للديمقراطية.. عارف ليه؟ لأننا كلنا جهلاء وثقافتنا قشور ووعينا سطحي ومش أحرار... الديمقراطية نتيجة لعوامل لازم تتوفر.. أولها وعلى رأسها الحرية ..حرية الفكر ..حرية التعبير ، حرية الرأي والإرادة الحرة ، اللي رفضت في يوم حاكم وثارت عليه، ثم قبلت في يوم تيار سيادتك .. ثم أعلنت رفضها له لما شافته مش قادر على تلبية تطلعاتها..حتى لو كان كل اللي حصل خدعة كبيرة. فالكل اتخدع والكل غلط بدرجات وأولهم حضرتك .. متنساش انك واحد من الشعب إن كنت معتبر المصريين شعبك وناسك اصلا ..أبدأ بنفسك والكلام ليا انا كمان ولينا كلنا ..عيش الديمقراطية في تعاملاتك في كلامك في ثقافتك واطلاعك..انزل للناس وقرب منهم واعرف عقليتهم ونفسيتهم وحقيقة مشاكلهم وازماتهم على أرض الواقع وبعد كده ابقى اتكلم وحاسب واشمت . يا عم وجدي ..المجتمع كله بما فيهم انا وأنت مجتمع متخلف ضحية للقهر والاستعباد والتجهيل.. لف بقى على بيوت وعشش ملايين البشر اشمت في مصايبهم واحد واحد عشان مسمحوش لحد في عقلية حضرتك يبقى له مكانة ودور في قيادة الوطن.. اسامحك ازاي بعد ما خليت اللي شمتوا ولسه بيشمتوا في اللي ماتوا واتحبسوا يطلعوا يردوا عليك ..واسمعهم بودني بيعيطوا على الدين وبيتكلموا على الرحمة والإنسانية ؟؟ احنا عايشين في مسرحية عبثية والله.