هاني صبحي يكتب: هل لزاماً علينا أن نستمع لنصيحة وليد الفراج... ونركن على جنب؟
بقلم: هاني صبحي
وليد الفراج..اعلامي رياضي سعودي، اشتهر بتقديم برنامج" أكشن مع وليد" .. والاكشن اليومين اللي فاتوا حقا كان على أشده.. بطولة عربية تحت مسمى بطولة كأس الملك سلمان للأندية.. مقامة بالسعودية.. ملاعب ونقل تليفزيوني بكفاءة عالية.. مليارات تركض على البساط الأخضر. ونجوم كان الحديث عن انتقالهم للعب في الدوري السعودي أو أي دوريات عربية، محض تهيؤات وأحلام عصاري بعد أكلة تقيلة.. شفنا رونالدو وساديو مانيه بيتبادلوا التهنئة كزملاء ملعب بنادي النصر السعودي، وهما بيحتفلوا بهدف للدون في مرمى الزمالك المصري!! وشفنا كريم بنزيما بيحضن طارق حامد بعد هدف لمصلحة اتحاد جدة. وشوفنا فيرمينو بيجيب الهاتريك ومش بيجري على جمهور الريدز . ولا بيحضن محمد صلاح ولا ڤان دايك.
الثلاثية كانت أهدافه الاولى لمصلحة فريقه الجديد الأهلي السعودي.. فكان طبيعي إن المشاهد الغريبة دي، اللي من سنوات قليلة لم يجرؤ أحد على مجرد التفكير فيها، كان طبيعي تصاحبها مشاعر الفرحة والنشوة لكل مواطن سعودي مش بس إعلامي.. وأرى إن حتى المبالغة في وصف الحالة ليها ما يبررها.. وده اللي حصل مع الإعلام السعودي حين وصف نهائي البطولة، اللي بالصدفة كان بين فريقين من أكبر فرق السعودية. وأكثرها شعبية وتنافس.. النصر والهلال.. الإعلامي وليد الفراج وصفه كوضع حالي، بأنه ديربي الشرق الأوسط.. الوصف اللي معجبش أحد المتابعين المصريين.. فجاءه الرد وجاءنا كمصريين كمان، قاسي ومباشر ويحمل لمحة سخرية واستهزاء.. الأمر اللي تسبب في حالة من الجدل والتراشق الإعلامي اللي موقفش عند رواد السوشيال ميديا. وانما وصل للإعلام والمسئولين عن الكورة في مصر.
والحقيقة وبكل صراحة ..انا مش شايف إن الاعلامي ده أخطأ في حاجة غير لهجة التعالي والتقليل والاستهزاء، اللي هي بالمناسبة لهجة كل خليجي في كل ما يخص مصر وشعبها.. وإن كنت شايف إن الجميع أخطأ.. كلنا في منطقتنا العربية، بنعيش في حالة من الطنين .. احنا بنعاني من كوننا ظاهرة صوتية، مبنقدمش للكوكب غير الخناق والصراعات والمعارك الصفرية..المنطقة دي كلها عبارة عن مجموعة من الديوك المتصارعة اللي ، مبيصدرش عنها غير الدوشة. والمسافة كبيرة وبعيدة، بيننا وبين الشعوب اللي تقدمت وانجزت. ورفعت من قيمة العلم والتكنولوجيا والثقافة والإبداع والابتكار.. وقبل منها رفعت من قيمة الإنسان نفسه، في تعليمه وصحته وكرامته ورعاية مناطق إبداعه. واعطاؤه الفرص لقدراته ومواهبه يستفيد بيها ويفيد بلاده ..احنا عايشين في كوكب موازي .. السيد وليد حر يفرح ببلده ..لكن على أرض الواقع هو مقدمش شئ للبشرية ولا عنده اصلا اللي يقدمه غير الفلوس في زمن الفلوس.. واحنا كمان معشر المنزعجين من تطاوله وسخريته مبنقدمش للبشرية غير الشوفينية ونظريات السبعتلاف سنة حضارة وأمجاد الماضي السحيق بحقائقه وهجصاته وأساطيره..
هو كإعلامي من حقه عشان يبيع بضاعته يقول إن ديربي النصر والهلال أقوى ديربي في المجرة.. راجل بيسوق بضاعته زيه زي عم فكري صاحب عربية الكبدة اللي حاطط يافطة إن عنده أحسن ساندويتش سجق في مصر.. فاصطدم بواحد من حاملي چينات القنعرة الكدابة وحضارة السبعتلاف سنة مدحت شلبي وأيمن الكاشف اللي بينقلوا الڤار على تروكسيل يرازيه ويقول له اوعى ياعم الحاج نصر ايه وهلال مين!! حط نفسك مكانه ورد كده بداله؟؟ ده كويس أنه لخص ومقالش كل اللي انت بتقوله كمصري وانت قاعد عينك مزغللة ونفسك بيضيق وبيجيلك سعال ديكي وانت بتتابع متعة وحلاوة وإثارة الايجيبشان ليج اللي جمعية المحترفين بهولندا أصدرت تقرير يحذر الأجانب من اللعب فيه .. هنلوم على إعلامي سعودي بيحب بلده وفرحان بيها على لهجته المتعالية في الرد على مصري يشبهه في التعالي والفوقية والفرق بينهم إن ده متعالي معاه فلوس وده متعالي شحات؟
هنلوم عليه ومش هنلوم على مسئول طالع يرد عليه ويقول له (ابي) من (ابي) ده كويس أنه مقالوش إيه دخل ابوك بالموضوع!! مسئول مهمته يخدم كل الفرق ويعدل بينهم وهو اصلا له مناصب قيادية في ناديين بيتنافسوا في المسابقة.. مسئول بيدافع عن ديربي محدش فينا شاف الجون الاول فيه غير في الإعادة.. وملاعب ترمي الإبرة ترن وارضيات غيط البطاطس نجيلته مهذبة عنها .. ونقل تليفزيوني يجيب صداع وأندية شعبية اتهرست هي وجمهورها لمصلحة المؤسسات والشركات!!
أيوه وليد الفراج متعالي ومتغطرس ومش هيقولك إن رونالدو وساديو وفيرمينيو وبنزيما وغيرهم مكانوش هيعتبوا السعودية لولا الفلوس ..الفلوس وبس .. هي دي القيمة الوحيدة اللي تملكها دولة لاستقطاب عواجيز اللعبة اللي جايين يسووا معاشهم.. يبقى خلينا في حالنا ونسعى ونشوف هنعمل ايه عندنا عشان نفوق من الغيبوبة دي .. اللي صرح بيه وليد في العلن هو نظرة الناس دي لينا كلنا في كل المجالات.. انت يللي قلت له أبي من أبي..كنت فين واحنا بننسحق قدامهم فناني هوليوود الشرق بيروحوا يمارسوا ابشع صنوف التملق والنفاق والانسحاق قدام الريال وخليت نظرتهم لينا في غاية الدونية والرخص.
ايوه انت ساعدتهم زي غيرك يتعلموا ويبنوا ويلعبوا كورة..ساهمت في مساعدتهم في طب وعلوم وهندسة وغيره .بس معلمتهمش جدعنة ..انت اشتغلت واستفدت وقبضت التمن .. ولما بدأوا يفكروا في التطوير والتقدم والاستغناء عنك وانت غارق في مستنقع الفشل والجهل والتواكل بتقولهم مكانش العشم وكأنك ماسك عليهم ذلة.. نفوق بقى وننشغل بحالنا عشان نحاول نلحق نفسنا وننقذ ما يمكن إنقاذه.. لأننا بنبعد كل يوم ..وعجلة التطوير والتنمية والحداثة دايرة ومش بتستنى حد.
