بلاها فلسفة بلاها علم نفس ... خد برمجة!!

تشرفت بسماع الأستاذ تامر أمين، وسمعت كل اللي قاله بخصوص التعليم ومواده، وما يتوجب على الطالب دراسته وما وجب نسفه من المناهج نسفا من المواد ولو أمكن نسف مدرسينها بالمرة، والحقيقة كنت مستاء جداً من هوجة الهجوم غير المبرر على إعلامي المفضل... أيوه متستغربش وتقولي هو فيه حد لسه بيتفرج على تامر أمين أو الإعلام المصري من أصله؟؟

انا بلا فخر Top Fan's لتامر وتابعت كل معاركه الفكرية والأخلاقية اللي تهد جبال وتقعد اجعصها مذيع في بيتهم بالبيجاما، من أول احترامه الفائق للصعايدة والفلاحين اللي بيخلفوا بنات عشان يبعتوهم يخدموا في البيوت، مرورا بصراعه الفكري والثقافي مع السيدة الفاضلة فيفي عبده، أو دينا تقريبا ..أو كلاهما مش فاكر بالظبط وصولا لهجومه على المصريين اللي مبيستحموش وسخريته من البسطاء في التعامل مع وباء كورونا رغم أنه كان أحد أبطال موقعة الكرومنيوم والتوابل الهندي كوصفة سحرية حاسمة لتركيع الفيروس وهزيمته هزيمة نكراء.. إن لم يكن تامر أمين أو من على شاكلته، هما اللي بيتصدروا المشهد الإعلامي ومنافذ الوعي في تلك الحقبة الخطيرة من عمر الوطن.. يبقى قول على البلد يا رحمن يا رحيم، أو على الدنيا نفسها السلانكاتيه..

والحقيقة إني فعلا في موقفه الأخير متضامن مع ما طرحه الإعلامي الكبير، وأضم صوتي لصوته..

ليه صحيح ندرس تاريخ ونتعرف على هويتنا وحضارتنا وموروثنا الشعبي والثقافي والإنساني ونربط ماضينا بالحاضر عشان نعرف احنا واقفين فين ورايحين على فين؟

ليه نعمل جسر بين ماضينا وحاضرنا، ونفهم أي سياق وعوامل وظروف نشأت فيها أي مجتمعات، هي البلد عدمت جسور وكباري يعني؟؟ ما الجسور في كل شبر في مصر بتسلم على بعض في الجو

ليه ندرس جغرافيا؟ والجغرافيا نفسها متغيرة .. النيل النهاردة موجود .. بكرة مين عارف! مش يمكن يحصل بروتوكول تعاون، يمكننا إننا نروح لإثيوبيا بجردل عشان نستحمى؟

الجزر اللي امبارح على الخريطة، قد يشاء ربك وكله بالقانون أنها تخش ضمن كردون المباني لدولة تانية خالص..

النهاردة فيه "راس حكمة"، قد تختفي الحكمة قضاء وقدر، أو بسبب عوامل التعرية، ولا يتبقى للوطن سوى الراس.

ليه ندرس فلسفة ومنطق - والعياذ بالله- يطلع جيل يناقش ويحلل ويفند.. يتأمل، ويفكر، ويبدع، ويبقى له حس نقدي وكل الهرطقة وقلة الأدب دي، وييجي عيل ناقص تربية يقف قصاد مسئول أو حد من العيون الساهرة على خدمة الوطن أو الأستاذ المطرب محمد فؤاد، يتناقش معاه ويأخذ ويدي في الكلام عادي كده ؟؟

فلسفة وأدب وتاريخ وعلم نفس ومواد أدبية ايه اللي عايزين عيالكم يدرسوها؟؟

ليه الأجيال اللي طالعة تفكر بطريقة "نقدية"، وهما قادرين يتعلموا برمجة ويلعبوا "بالنقدية" لعب؟

وايه علم النفس ده كمان؟ علم نفس يعني شخص عايز يفهم النفس البشرية، ويعرف ازاي يحكم عقله ويبقى صاحب مبدأ... ودي لوحدها جنحة، أحيانا بترتقي للجناية، وقد تصل عقوبتها لــــ 30 جلدة عند أحد أعمدة المونوريل في حالة اعتراف المتهم أمام المحقق بأنه صاحب مبدأ..

متضامن مع العزيز الغالي تامر أمين ضد الهجمة الممنهجة ضده

وأحب أضيف كمان إن ليه الطالب يضيع سنين عمره في دراسة الإعلام لما في الآخر مش هيشتغل في الإعلام غير بواسطة لأن المجال محجوز حصريا للي زي تامر أمين.