”السعودية” ماريا ... وترابها زعفران!!

من وقت للتاني كده، بيحركني الفضول، أو تقدر تقول الرغبة في شوية ادرينالين من اللي بيتم إفرازها أثناء مشاهدة أفلام الرعب، وبأخذ قرار إني والعياذ بالله افتح بيت الرعب المسمى برسائل ال Other ، لعلي أحصل على جرعة من الإثارة والتشويق .

والحقيقة انها فعلا لم تخيب ظني قبل كده ، خصوصا وإني بيتقال عليا إني شخص صدامي ومنشوراته على وسائل التواصل أكيد لها منتقدين ومعارضين أو حتى كارهين في المطلق لشخصي عموما .. بس فيه رسالة منهم استوقفتني الحقيقة، صاحبها تركها لي، بعدها عمل لي بلوك عشان ميشوفش حتى ردي عليه .. الشخص ده كان واضح أنه سعودي الجنسية، معتز جدا بالملك وولي العهد، والرسالة عبارة عن شتايم وألفاظ من المنقي خيار، مع الكثير من اتهامات الحقد وكراهية السعودية وشعبها، وطبعا منسيش الطعمية.. على الرغم من إن حكاية الطعمية دي في حد ذاتها عمري ما فهمتها كوسيلة يعني للتحقير والتقليل من الشأن!!

ماله يعني القرص السخن أبو سمسم اللي ريحته ترد الروح ده مع شوية طحينة ورغيف بلدي ورشة كُسبرة وكمون!! ده غير أنه واضح إنه مش متابع الشأن المصري كويس، ولسه بيعتبر الفول والطعمية طعام الغلابة والفقراء.. ميعرفش نظرتنا بقت عاملة ازاي لأي شخص واقف اليومين دول بيفطر على عربية فول، وكم الاسئلة والشكوك التي تحوم حول مصادر دخله اللي مكنته أنه يقف بالثقة دي ويدفع المبلغ ده على غيار الريق كده !! المهم إني بصيت على وقت الرسالة، عشان أعصر دماغي، انا امتى اصلا اتكلمت عن السعودية، فضلا عن اني اساسا عمري ما أهنت السعودية وأهلها.. بالعكس اعرف منهم كتير واتعاملت مع سعوديين .. ناس عادية يعني ..شبهنا وزينا ، منهم الصالح والطالح .. بشر يعني زي مخاليق ربنا.. سمعت حكاوي من مصريين ، عن كفيل كان اكتر من أخ وصديق ، وكفيل وراهم الويل.

المهم إني استنتجت ان توقيت الرسالة ، تزامن مع منشور ساخر ، على خلفية فيلم "حياة الماعز" - الفيلم اللي رأيي فيه بالمناسبة أنه تعبان وضعيف المستوى.. لكن الغريب في الأمر ، إني موجهتش المنشور للسعودية ولا سخرت منها ، قد ما سخرت من أساطير وأبضيات النخبة المصرية، ورؤوس حربة التنوير وحقوق الإنسان على موقفهم من الفيلم.. اللي هو "لا موقف" ..الخرس التام.. الخرس اللي مصاحبهم بشكل واضح في كل ما يخص الخليج عموما، والسعودية على وجه الخصوص في أي أمر سلبي قد يحدث في أي دولة في العالم! .. ده انا حتى كنت مؤدب كمان مع النخبة المصرية، ومجيبتش سيرة الرز من قريب أو من بعيد.. كنت أتمنى فعلا أنه ميقومش بحظري.. كنت هتجاهل تماما الشتائم والاهانات، وهعتبرها سوء فهم.. وكنت هشرح له فعلا إن احنا مش بنكره السعودية ولا شعبها.. ولا رفعة وتقدم وإنجاز السعودية يضيرنا في شئ كمصريين

كنت هكتب له: اقولك التقيلة ؟ احنا مبنحبش "مصر" .. الكيان الاعتباري والكائن الاسطوري اللي بيسوقوه لينا حكامنا عشان منقولش ايه اديتنا مصر ونقول هندي ايه لمصر .. لأن كل دي قيم ومبادئ مزيفة بتتزرع بالزور والبهتان زي اشتغل واتعب وفرفر وموت...موووت كهدف في حد ذاته متنتظرش منه مقابل..المهم انك ترضي الوطن ومش مهم أنت.

احنا بنحب مصر الناس.. المواطن..الإنسان .. احنا بنبقى على استعداد في الحروب والاحتلال والاستعمار نموت فداء للوطن..بس مش الوطن الكباري والفنادق والمؤسسات.. الوطن هو الانسان.. اخويا وجاري وصاحبي والعيل اللي بنلاعبه على كتف أمه في الاتوبيس وبياع البطاطا اللي بننكشه وننكت معاه والعجوز اللي بيقعد جنبنا على القهوة بيهزر معانا ويشتمنا باهالينا وعلى قلبنا زي العسل لما نشوف ضحكته من وسط صف سنانه اللي الزمن خطف نصه.. احنا مش بنهاجم منبطح بيبوس شباشب حكام السعودية، ولا رخيص بيمسح جوخ ويتملق مسئول سعودي من منطلق شوفينية واستعلاء..احنا أغلب واعبط من كده ...احنا "غيورين" .. بنحبها البلوة السودة دي حتى لو بننكر ده .. احنا هاجمنا محمد الحلو على مسارحكم مش لأننا كارهين السعودية ..لأن عمار يا اسكندرية يا جميلة يا ماريا غنوتنا للانفوشي وكرموز وبنات بحري اللي بيتمختروا على الإمة.

ماريا واحدة هي اسكندرية البحر والكورنيش.. سيد درويش وبيرم والصيادين ..العيال الصغيرة اللي كانت بتحدف الإنجليز بالطوب وتغني يا عزيز يا عزيز كُبة تاخد الإنجليز وتحايلوا على أمر الحاكم العسكري اللي منع ذكر اسم سعد باشا فجريوا في كل حارة وزقاق يغنوا يا بلح زغلول .. اسكندرية الفدائيين..وحتى بنات الليل لما جت لهم الفرصة يساعدوا المقاومة مترددوش.. احنا مبنكرهش حد ولا بنتعالى على حد ..بس احنا احفاد لشعب كريم اوي وناس طيبين اوي .

احنا غيرانين على ضباط وشعب الإسماعيلية فى ٢٥ يناير اللي دافعوا بأرواحهم عن القسم ..احنا أبناء الغريب وأحفاد أبطال السويس وبورسعيد..احنا ولاد السمسمية والنبوت.. احنا عيال مصر اللي حابينها بعبلها..بضعفها وقوتها..بقرفها ووجعها ولحظات رضاها.. احنا مش مزودينها ولا يفرق معانا السعودية تبقى احسن بلد في العالم ربنا يوفقهم ميشغلناش...احنا بس عايزين المنافقين ، يسيبولنا بس ذكرياتنا وشوية اعتزاز ويروحوا يترقصوا وينبطحوا ويمارسوا كل عروض الاستربتيز زي ما هما عايزين...بس يخلوها مبادرة قلع شخصية ..ميحشروش اسم مصر في الموضوع